Oskespiralen
Leander Djønne møter Karl Ystanes til samtale om brakdebuten “Oskespiralen”.
På symposiet i fjor hadde vi sleppfest for Oddaforfattar Leander Djønne sin romandebut Oskespiralen. Boka gjorde tungt nedslag i litteratur-Noreg og fekk uvanleg mange (gode) meldingar, før ho vann Lytternes romanpris som årets beste bok. I år inviterer vi til nytt møte med Djønne i samtale med Karl Ystanes, på den nyrestaurerte skrivargarden på nordsida av Ullensvang kommune.
Oskespiralen er ein mørk roman, og ein ein god representant for den magiske dreiinga vi meiner å sjå i samtidslitteraturen. I boka er det urkreftene som rår.
Sonen har sona straffa si, han ynskjer hemn. Broren leitar etter ljos og frelse. Faren byggjer gravhaugar. Mora ropar frå dødsriket. Oskespiralen er ei forteljing om to brørs oppgjer med fortida, ein far med umenneskeleg framferd og ei ur som er i ferd med å losne over heimegarden. I Leander Djønnes særeigne prosa blir valden og raseriet som gjennomstrøymer denne slekta skildra med nådelaus kraft.
Ru nevar heldt stramt rundt sleggjeskaftet. Sleggja heldt han balansert i brattbakkane. Sleggja og spettet. Han høyrde til her. Ikkje der ute som fjorden opna seg. Her inne var det. Mellom stupbratte fjell. Mellom ras, steinrøyser og jord. Stubbebrytar, feisel, bergjarn, kilar, sleggje, spett. Reiskapar roa han. Kjensla av å arbeide med tida, ikkje mot ho.
Sjå lenkja for meir informasjon og for kjøp av billettar.